攪下一腳踏兩船

感情最難控制，有時唔覺意都會一腳踏兩船！咁邊Ｄ星座男接受到，邊Ｄ星座男會發癲呢?雖然話一腳踏兩船係大錯特錯的行為，但係感情呢樣東東好難控制，咁響12個星座入面，邊個星座男係最難忍受做第３者呢？



白羊座
未拍得成拖之前，佢會好甘願做一個第３者守候你身邊，但係一旦拍拖，佢就會同第二個人分享，會諗埋ｄ屎橋整散你同你男友為止，同佢一齊要有另一邊分手的準備。
金牛座
好好先生一名，如果你自己同男朋友一日未攪清楚，佢都會想成為你另一個男朋友，當然如果你呃佢冇男朋友就另當別論，不過最好都係唔好同佢玩３角關係，金牛座會退出。
雙子座
無論你係第３者又或者佢係第３者都覺得冇乜所謂的星座，問題唔係響佢專唔專一呢度，而係對佢講拍拖冇乜衝擊就不如唔好拍，所以偷偷摸摸佢反而覺得好玩添！
巨蟹座
嘩！呢ｄ咁麻煩又要冒險的遊戲當然唔係巨蟹男杯茶，不過咁難得可以同到你響一齊佢點都會畀ｄ時間睇下你會唔飛你男友，但係呢，一拖得耐佢就唔再奉陪落去。
獅子座
響呢個時候睇排位，如果你將獅子男放響自己男友上面，而且令佢覺得佢響你心目中係好∼重∼要，咁佢為令你幸福，佢都唔係咁介意你多一個觀音兵，當然佢一定要係一號。
處女座
你要佢做第３者？冇問題，麻煩你飛開你男友先！佢一個已經夠晒你煩，你仲要攪多個都真係搵苦來辛囉！當然另一點係佢都唔係咁受得同人分女友，呢點要好好留意！
天秤座
鍾意得你佢就唔係咁理到底自己係唔係第３者，就算你一路拖住唔分手佢都唔會迫你，只會一路點點守候你下決定！（當然響佢自己背後可能都煩惱緊同你定同第二個一齊……）
天蠍座
「做第３者？冇問題，好女仔當然一定會有男朋友！」佢會咁答你，不過麻煩你即飛自己個男朋友，佢妒忌心咁強，再加上有ｄｄ復仇傾向，斷估你都唔敢同佢玩一腳踏兩船……
人馬座
基本上只要知你有男朋友佢就唔會考慮同你發展落去，一旦瞞住佢畀佢知道都係聽分手，不過，響呢個時間佢本身都可能講緊有幾個女朋友，但係你就唔可以有幾個男朋友。
山羊座
佢會一方面表現得好唔介意做第３者，另一方面又會猛落重藥攪到你為佢而落決定揀一個，不過呢，當事情解決好之後佢會原型畢露，你就會好後悔落呢個決定。
水瓶座
佢一係就唔插隻腳落去，一叉得落你度佢就預定做愛的守護者，好好咁守護你，但係要記住唔好太過份，因為佢又會好靈異咁突然之間走鬼左，點叫到叫唔返。
雙魚座
出晒名任勞任怨，講到做第３者佢就最稱職，千祈咪以為佢傻，其實佢不知幾精，心裡面已經盤算晒跟住點做，佢唔一定諗住坐正，但係就一定響你身上拎到佢想要的東東。