[轉貼]「港女」大反擊
「港女」大反擊「港女」一詞，在網上愈辯愈激。「港女」非指所有香港女性，其特質包括︰迫男友買名牌、所有使費由男人畀、女人大晒、勁減肥、憎北妹等。
25歲的阿鴻，上星期更在銅鑼灣實行其「反港女快閃」行動，雖然只有他一人參加，但卻在網上贏盡港男尊敬。「港女」勢成過街老鼠，但《便利》訪問了三位自認「港女」的女仔，自辯她們橫蠻無理都是「為勢所迫」，她們更不憤被大肆批評，決定站出來為「港女」平反。
case1 男友唔鬧唔得
Yan 27歲 OL
「我認我係『港女』，但係我唔覺得自己有錯！」27歲的Yan挽價值$4,650的LVspeedy30、手戴一隻約5千元的鑽戒，全都是現任男友阿健送的。拍拖三年，阿健還送了兩個Fendi及一個Burberry銀包，合共約5萬元。買名牌唔過分對於叫男友買名牌，Yan覺得好正常︰「LV都有平有貴，我都係叫佢買4、5千蚊。況且我心目中，LV都唔算咩名牌，BV、Chloe成萬蚊個先至算名牌，我唔算過分。」阿健不是甚麼闊佬，他在地盤駕駛「吊雞車」，平均月入1萬2千元，每月要付4千元家用，若然開工不足，自己的使費連8千元都沒有。至於Yan則是中五畢業，在一間貿易公司當OL，月入不足1萬元。「我雖然已經27歲，但外表真係唔似，好多人以為我得23歲，我皮膚又白又滑，不過就算天生靚都要後天keep，試過同佢朋友一齊去街，佢朋友條女同我差好遠，我條仔都唔知幾威！」故Yan準備以「女為悅己者容」為由，待男友下月糧頭時，叫他買護膚品給她。奶奶都冇面畀除了使男友錢使得天經地義外，Yan還在「有需要時」以粗口當眾辱罵男友。「外人唔明，我鬧佢係佢自己。」有次阿健與她家人一起到酒樓食飯，大家興高采烈起筷時，阿健說好飽，只吃了少少就放下碗筷，便即時觸怒Yan︰「我一刻火都，咪當眾大聲講粗口鬧佢『×，係咪咁唔畀面呀！』，佢聲都唔敢聲。」Yan的家人都嚇得低頭不語。即使二人平時通電話，只要阿健回答稍為遲疑，Yan都會不耐煩地即時以粗口相待。
Yan就連對「未來奶奶」也不客氣︰「我同自己講過，佢咁恨飲新抱茶，我要佢死之前，都唔會嫁畀阿健，等佢了唔到心願！」原來三年前，Yan第一次見伯母時感到被冷落，故深生不忿︰「我已經好識做，笑臉迎人，點知佢竟然對我擺款，唔睬我，佢以為自己個仔係咩新鮮蘿蔔皮，做地盤有咩出色。」
Yan對自己狂使男友錢，自有一番理論︰「你唔好覺得我恰佢，男人有錢就會身痕，我好清楚佢財政狀況，平時我會睇定有咩鍾意，到佢收入較高月份就會叫佢買畀我。一來阻止佢作反；二來等佢唔使畀咁多錢佢阿媽。」曾經傷過痛過
Yan是典型「港女」，看似橫蠻無理、貪慕虛榮，原來曾經受情傷。她自幼父母離異，靠母親做酒樓推點心獨力撫養，十多歲便要做兼職幫補家計，對父親的感覺從未好過︰「如果唔係佢同阿媽離婚，我都唔使一早出打工養家，我都想有個好錫自己男人。」
20歲時，Yan便深愛了一個男人，甚至不介意「貼仔」，可惜遇個負情郎︰「佢搵唔到做，我唔介意有錢齊齊使，但竟然俾我發現佢一腳踏兩船，我覺得係自己太蠢。」自此，Yan對男人的態度就開始180度轉變，害怕受傷所以要先下手為強，她認為「港女」出現「係男人自己」。
case2 搵北妹好冇腦
Jenny 18歲 美甲師
18歲的Jenny性格爽朗，生於小康之家，中五畢業便當美甲學徒，喜歡上網的她，留意到現時很多討論區都有反「港女」的言論，並鼓吹香港男仔回內地結識女朋友，認為內地女子樣靚身材正、溫柔體貼，「港女」完全冇得比。「香港男仔唔只cheap，仲要冇腦！醒啦，大陸北姑都係諗住可以嫁香港先睬你咋！」Jenny覺得港仔只是自欺欺人：「港仔因為冇錢又唔上進，對住賺錢能力高『港女』自然自卑。但返大陸就唔同，千零蚊已經可以做大豪客，佢成日話香港女仔咩都要男朋友畀錢，係因為佢畀唔起，我就唔信佢北上大陸，食飯睇戲會叫北姑夾錢啦。」唔分手係仁慈
Jenny不單看不起北上的港仔，就連已拍了三個月拖的男友都不稀罕：「佢對我好好，聽晒我話，好可惜，我同佢拍拖一個月，就發覺自己都係麻麻鍾意佢。但係睇在佢對我咁好份上，所以我惟有拖住先，唔同佢講分手，但我唔係貪心，只不過唔想hurt佢，寧願佢自動自覺同我分開，我咁樣已經好仁慈。」Jenny現時只准男友每日最多打一次電話給她：「好煩，每日打多一次我都唔想聽。」但自己想見男友時，就要男友隨傳隨到：「我鍾意咩佢都會買畀我，好似Gucci電話繩、白金戒指佢都捨得買。有時候我睇中一樣想買，就會call佢出。」
Jenny認為，女人都希望結識一個能力比自己高的男朋友，所以花男友錢是應份，但有權利不代表有義務：「我使佢錢唔代表我冇話事權，男人要話事，落夜總會咪得。」快閃反「港女」變英雄上期接受《便利》訪問的「反港女快閃示威」發起人吳慶鴻，上週五隻身實踐了其快閃承諾，現已成為網上反「港女」的大英雄，大部分網友都向阿鴻致敬，大讚他講得出做得到。報道出街後，阿鴻話有唔少市民認為：「我唔要做英雄，男人應該團結一齊反『港女』咁先有用。日快閃完搭地鐵就即刻有人認得我，對我指指點點。」「港女」係為勢所迫被人笑到減肥對「港女」的批評，其中一項是「因過度減肥而導致營養不良，胸部比男人還要小」。17歲無業的阿Carr，5呎2吋高，100磅身材超fit，但她還想再減多10磅：「我目標係90磅。」其實Carr減肥前有115磅，BMI指數（標準身形指數）合格，但仍被身邊不少男性朋友取笑：「佢會叫我『減肥啦』，我都冇乜點嬲，始終我都係有肉。」上月她便開始減肥，終在一個月內減去15磅。對於不少港男批評「港女」勁減肥，她就覺得激氣：「其實都係男人覺得女仔要瘦，家成個社會都話要瘦，周圍都係減肥廣告，邊個女仔敢肥呀！」名牌文化影響
29歲的小依，於美國修畢碩士，現時和男友合資搞spa生意，她說自己是「港女」的過來人：「話香港女仔係拜金主義，但你睇，香港周街女仔唔係用LV、Gucci就係Fendi，如果人有你冇，就好似唔入流，情況就好似男人點都要買隻勞傍身一樣，佢（港男）冇資格批評人。」小依指美國的社會風氣不重名牌，甚至不重外表打扮，「美國女仔出街好求其，我覺衫都靚過佢，唔打扮都得。」令她漸漸脫離「港女」一族。港男愛北妹做財務公司經理的張生已與內地妻子結婚兩年，經常中港兩邊走，大讚妻子踏實純樸：「我太太唔鍾意名牌，一件衫過300蚊，要考慮好耐，就算我話要送手袋，佢都話唔要。只要我一心一意對佢，佢就好滿足。而且佢又對我父母好好，會做晒家務照顧佢。」30歲的張先生亦見識過「港女」的野蠻，不少朋友都被女友名牌，但他認為其實不只在香港，內地一樣有「港女」：「係深圳或上海都有唔少女仔好有目的，都係想搵錢。佢都有『港女』特徵啦！最緊要小心識朋友。」記者在街頭訪問過十位男士，有近半數表示有意返回內地識女朋友。
Yan手中的LV是男友阿健所送，她理直氣壯說：「如果個男人唔捨得花錢女人身上，代表佢愛妳程度有限。」
Yan反對男友做孝順仔︰「佢阿媽只當佢係搖錢樹，阿健難得返屋企食飯，佢阿媽會為打牌而叫佢自己煮公仔麵食，所以唔使對佢咁好。」
Jenny說大陸女仔都是貪香港人可以帶她來香港：「如果唔係咁多中坑返大陸娶18、22後生女做老婆喎，真係貪你靚仔成熟咩！」本身好名牌的Jenny，連指甲都畫上仿Chanellogo。
From 便利
呢個世界真係咁現實???
我諗香港既女仔唔係個個都係所謂既「港女」
當然.... 呢本雜誌寫既野既可信程度需要大家自己衡量 (我指俾訪者是否真有其人)
「如果個男人唔捨得花錢女人身上，代表佢愛妳程度有限」... 呢句真係....
莫非就要以男人肯花多少錢去評估一個男人愛你有多深??
實用相關搜尋: 討論區 香港 地鐵 3g 討論 深圳 車 花 減肥 it
